-
مش فاهمه نفسي
من زمان مكنش ليا صحاب طفولتى كانت وحشه اوي بالاخص في المدرسه مكنش في كد بيحبنى وكانوا يتجمعوا وميحبونيش اقتد معاهم ولا اصاحبهم وفضلت كده لحد ما بقيت في سنه 5 ابتدائي واتنقلت من الفصل وعرفت بنت من البنات حبيتها وبقيت اقول نفسي تكون صاحبتي وفضلت اكلمها او احاول اتعامل معاها عشان تبقي صحبتي ولما بقينا في سنه 6 بقيت اعبر عن حبي ليها واجيبلها هدايا يعنى لو جبت ليا خاتم اجيبلها لو جيبتلى شكولاته اجيبلها كده يعني وبعدين بقينا اصحاب ودى كانت اول صاحبه ليا وبعدين فضلنا 3 سنين صحاب لكن في السنه الرابعه ابتدت تتغير معايا ويبقي ليها صحاب تانيين وطريقتها اتغيرت وعمرها ما شاركتني ابدا ف حزنها وفرحها زى ما كنت بحكيلها كل حاجه واتغيرت بقي اخر فتره ف انا مستحملتش المعامله اللي اتغيرت دى كلها ولما خالى اتوفي معزتنيش ولقيت حاجات كتير اتغيرت ف سيبتها ومبقتش صحبتي بس وعدا علي الموضوع ده 4 سنين وحاليا مليش صحاب من بعدها وكل ما بنت تقربلي عشان نبقي اصحاب ابعد واحس احساس غريب وابقي مخنوقه ومش عاوزه اقرب منها وابعد عنها وممكن اقطع كلام خالص وانا بجد مش عارفه ليه بيحصل كده وليه بحس ب كده والفتره دى في بنت دايما احب اتكلم معاها واقول نفسي تبقي صحبتي ولما قربت مني شويه حسيت بخنقه جامده مع انى قولتلها اننا نبقي صحاب ومعنديش صحاب واني مش هسيبها بعدها حسيت اني عاوزه ابعد عنها ومش عاوزه صحاب وطول الوقت مخنوقه ومتدايقه انا ليه بحس ب كده مع انى في نفس الوقت محتاجه صحاب وناس تقربلي وتحبني بس لما حد يقربلي ابعد عنه انا زعلانه اوى اني بيحصلى كده وحاليا داخله في ال19 سنه ومليش صاحبه واحده ومش مستحمله يكون ليا بس برضو زعلااانه اني معنديش
-
2 Replies
-
السلام عليكم
احساس صعب فعلا انك تكونى عايزه حاجه ومش عايزاها في نفس الوقت ، او لما تجيلك تهربي منها ….
و احساسك انك بتهربي الان من اى بنت بتحاول تقرب منك وتبقي عايزه تصاحبك بالرغم من انك انتى بتبقي عايزه تصاحبيها …. ده خوف من الدخول في علاقه صداقه تانى وخوف من التعرض للجحود والامبالاه منها زى اللى اتعرضتى ليها مع اول صديقه ليكى ، فعقلك الباطن بيصورلك انك لو صاحبتى بنت تانى هايحصلك زى ما حصل معاكى قبل كده وهاتعمل معاكى زى ما عملت صاحبتك الاولى في حياتك
وده مش صحيح خاااااالص ….
لان الناس مش زى بعضها ، وكلنا مختلفين تماما عن بعض و الانسان طول ما هو عايش هايقابل ناس كتيييييير وهايتعامل مع ناس كتيييييير ، و اكيد طباعهم وسلوكياتهم هاتكون مختلفه ومتنوعه تماما عن بعض
ماتخافيش من الصداقه ، وماتستسلميش لاحساس الخنقه والنفور لما تقربي من اى صاحبه ليكى ، بالعكس كملى صداقه معاها وخليكى متوازنه في مشاعرك ، يعنى ما تقربيش منها اوى اوى وتلزقى فيها علي طول ولا تعامليها بجفاء و لامبالاه ،
واى علاقه صداقه تدخلى فيها ، لازم تبقي مهيئه نفسك انها ممكن تنتهى في اى وقت ، لان كل شئ معرض للزوال والانتهاء وبكده بتكون اعصابك هاديه ومفيش خوف من انتهاء العلاقه دى
كمان اختارى الصاحبه اللى شبهك في حاجات كتييير وبتحبوا حاجات كتير زى بعض ، علشان مايحصلش خلافات كتيره بينكم
ونصيحه اخيره … ماتحكيش كل حاجه عن حياتك الخاصه او اسرارك او اسرار اسرتك لاى صاحبه او صديقه مهما وصلت درجه حبك ليها او قربك منها …. لان النفوس بتتغير ، فلو حصل بينكم خلاف او افترقتوا لاى سبب ، ماتبقاش عارفه كل اسرارك وتضغط عليكى بيها او تبتذك بيها بعد كده
خلى دايما فيه حدود في التعامل بينك وبين اى حد ، وماتبقيش كتاب مفتوح للجميع ، الكل ممكن يقرأ اللى فيه بكل سهوله.
تمنياتى لكى بالتوفيق في علاقاتك وصداقاتك باذن الله
-
السلام عليكم عزيزتي السائلة اهلا وسهلا بيكي
كل فترة من حياتك هيبقا ليها اصدقاء مختلفين سواء ادرجتي الموقف او لا ولاكن احنا مش عايزين نديكي اجابة مش واضحة علي سؤالك احنا عايزين نكتبلك ايه اللي يفيدك في الموضوع ف اللي يفيدك انك تعرفي نفسك اكتر وده مش هيحصل غير بأختبار تحليل سمات الشخصية بنعملك تقرير مفصل علي شخصيتك بالتفصيل بمجرد انك تعرفي شخصيتك وايه هي سماتها تقدري تتعملي مع الناس بشكل افضل لانك خلاص فهمتي نفسك
مع ارق التحية نتمني لك الشفاء العاجل
Log in to reply.