-
تشتت وعدم ثقة وتردد وحيرة
هحكي لحضرتك الموضوع من البداية خالص بحيث اوصل لحضرتك الصورة كاملة ..
انا محمد شاب ٢٧ سنة مهندس حاسبات شغال الحمدلله في مجالي ومرتبي كويس ..انا من مصر ..من اسرة متدينة وملتزمة دينيا ولد وحيد وباقي اخواتي بنات ..والدتي متوفية ووالدي عايش الحمدلله شغال مهندس والاسرة ممكن نقول متوسطة ماديا الحمدلله ..المهم انا مشكلتي بدات تقريبا على مافتكر من ٣ ابتدائي ..من صغري بحكم اننا بيت متدين فكان دايما فيديوهات الموعظة وقصص المواعظ من الموت وكده بتبقى موجودة على الكمبيوتر في وكنت بتعرض ليها بصورة او باخري سواء حد بيسمعها من البيت او مثلا بتبقى موجودة قدامي وانا قاعد ع الكمبيوتر فالفضول كان بيخليني اشوفها احيانا ..المهم انه انا الحاجات دي اتعرضلتها كذا مرة وانا صغير لحد ما للاسف بقى عندي خوف مرضي من الموت او اي حاجة لها علاقة بالموت ..فاكر اني كنت بصحى بليل وانا صغير وبتجيلي نوبات هلع وكنت بحاول اقاومها واحاول اخد نفسي وممكن اقعد الف في الشقة لحد ماتروح وانا طبعا كل مرة بتيجي في دماغي المشاهد والصور بتاعت الموت بقى والقبر والدفن وكده واللي كنت شوفتها قبل كده ..واستمر الوضع على كده وانا مش فاهم اوي في ايه وبيحصل معايا كده ليه وكان طبعا كل مرة يحصل معايا كده كنت بفتكر اني بموت بجد وبتعامل على هذا الاساس وكنت بقاوم اه ولكن الشعور اني بموت فعلا كان بيبقى متملكني ..افتكر صحيح اني كنت في ٣ ابتدائي متفوق في المدرسة ولكن من بعد ابتدائي وبعد ظهور الموضوع ده مستواي قل مش عارف هل بسبب حاجة زي كده وللا ملوش علاقة مش عارف صراحة.. المهم الموضوع استمر معايا وبقى بيحصلي شبه يومي مرة او اتنين مثلا وبالذات لما اقابل حاجة تفكرني بالموت وحتى مكنتش بحب اروح جنازة او اسمع خطب الجمعة اللي فيها تذكير بالحاجات دي وكنت بحاول اتهرب من المرواح للصلاة الجمعة .المهم حياتي استمرت كده طول مانا بعيد عن الموت او الحاجات اللي بتفكرني بيه الدنيا تمام وكنت بعيش حياتي عادي لكن اي حاجة تفكرني يحصلي نوبة الهلع حتى برضوا فاكر اني كتير مكنتش بعرف انام طبيعي كده كنت لازم اشغل حاجة كارتون مثلا لحد مااروح في النوم .. المهم استمر الوضع لحد ماجيت اولى ثانوي ووالدتي تعبت وماتت وقعدت فترة متأثر وجت الثانوية العامة وجيت مجموع علي قدي ودخلت هندسة خاصة ..صحيح اهم حتة نسيت اقولها.. وانا في مرحلة الثانوية العامة كنت بدات احاول اشوف تفسير للحاجات اللي بتحصلي وكنت معتقد اني الوحيد في العالم اللي عنده الحاجات دي طبعا مصاحب للنوبات دي فترات اكتئاب واحباط وكسل وماشابه بقى ..المهم اتكلمت مع الشيخ اللي كنت بحفظ معاه قران بما انه دكتور وممكن يفيدني وكان كلامي معاه اني مقتنع اني تقريبا مسحور او معمولي عمل او اي حاجة بقى من الحاجات دي ولكن كلامه معايا انه لازم اروح لدكتور نفساني يبص علي ووصلتي بدكتور زميله ورحتله وبدات احكيله وبدات معاه رحلة علاج وكنت مبسوط جدا انه اخيرا في حد تقريبا فاهمني وييشرحلي انا عندي ايه ومشيت على علاج اسمه تقريبا لوسترال وكان بيجيب نتيجة والنوبات كانت بتقل وللاسف بعد فترة لما بدات احس اني كويس وقفت العلاج من نفسي وللاسف طبعا بعد مدة بدا الموضوع يرجع والنوبات تيجي تاني واضطريت ارجع للدكتور ومشيت معاه على كورس علاج تاني اسمه سيسرين ونفس الموضوع لما بقيت كويس وتمام وقفت تاني من نفسي بس المرة دي كنت مشيت مدة طويلة على العلاج قبل مااوقف فلما وقفت قعدت فترة حوالي سنة او سنة ونص كده كويس ومفيش نوبات الهلع لحد مابرضوا للاسف في اخر سنة لي الكلية بدا الموضوع يجيلي على خفيف كده بس للاسف زاد مع الوقت لاني كنت بدات اصلي امام في رمضان ووقت الصلاة كنت ببقى متوتر والنوبة كانت بتجيلي وانا واقف بصلي بالناس وانا بحاول اقاومها بس المقاومة هنا اصعب طبعا لاني مش هينفع اتحرك او اسيب الصلاة وامشي يعني ..يعني قبل كده لما كنت بقاوم النوبة كنت بغير مكاني .. اروح اشرب مياه .. اقف اشم هواء في البلكونة .. وهكذا.. المهم اخر مرة رحت للدكتور جارنا وقررت المرة دي انتظم علي العلاج باي طريقة وقد كان فعلا قعدت حوالي سنة وحاجة بسيطة منتظم على الرغم من العلاج اخر مرة كان اسمه ستاتومين وكان تقيل علي جدا وكان بيقلبىي بطني كل مرة اخده بس الحمدلله انتظمت لحد ماوقفت العلاج بناء على كلام الدكتور..والحمدلله داخل في ٤ سنين اهو او اواكثر النوبة تقريبا اختفت بنسبة ٩٥٪ اللهم الا في الفترة الكورونا جتلي مرتين تقريبا بس مكنتش بتاخد معايا وقت يمكن هي اول مرة بس لما حسيت ببعض اعراض الكورونا ولكن لما جتلي مرة تانية متعبتش في مقاومتها اوي يعني.. المهمم بقى بعد ده كله انا بكلم حضرتك ايه ..انا حاليا زي ماقلت معنديش مشكلة في النوبة او الخوف من الموت لانه كده كده كل واحد له وقته ولما يجي وقتك مش هتقدر تغيره لحظة فانا بحاول مشغلش بالي بالقصة دي لانها متعبة وبتشتت الواحد وبنسبة كبيرة ناجح في كده الحمدلله ومخاوفي من الموت تقرييا طبيعية اللي هو هتسيب اهلك وهيزعوا عليك وهكذا وكده..لكن المشكلة حاليا بدات الاحظ نفسي الفترة الاخيرة بالذات خمول وكسل واحباط كده واني مش بستوعب كويس وفي توتر .. يعني مثلا لو في في خناقة حصلت او مشكلة معايا او بحد من اهلي تلاقي ساعات في رعشة كده وساعات الموضوع يعدي طبيعي ..وبقيت احس اوقات كتير بخوف داخلي هو اه مش بيوصل لدرجة نوبة هلع بس قلق كده وعدم ثقة كبيير بالنفس غير الاخباط والخمول الدائم والكسل وعدم القدرة على الاسيعاب اوي واحيانا اعمل مجهود عادي احس بعدها بخمول وتعب واحيانا لا..عارفة يادكتور اللي هو انت مش فاهم في ايه ومش عارف مالك ..طبعا انا مبقتش صغير وضيعت فرص في حياتي كتير خاصة في حياتي بسبب الكسل..زمايلي اللي قدي ماشاء الله شغالين في شركات محترمة ومرتبهم كويس واللي خطب واللي متفوق في شغله وبقيت حاسس اني متاخرر ومليش نفس اذاكر كورسات ولا اطور من نفسي وفي نفس الوقت ضميري بيانبني وزعلان جدا وغير اني حاسس اني مش قد المسؤولية قدام اخواتي ووالدي مش عارف ليه دايما متردد ومش بقدر اخد قرار كان نفسي ابقى حد يعتمد عليه ويشيل مسؤولية واساعد والدي في حمل البيت واحسسه اني راجل معاه ويعتمد عليه مازلت بغلط في حاجات تافهة ومبركزش في حاجات لازم اركز فيها ..الواحد تعب والله يادكتور ومش عارف اعمل ايه..
لحد هنا تمام وكل اللي بيحصلي ده انا كنت مشخص نفسي اني غالبا بعاني من اكتئاب وقلق لحد ما في مرة كنت على النت بجرب اعمل اختبار القلق على موقع كده فيه اختبارات نفسية المهم من ضمن الاختبارات لقيت اختبار لمرض اسمه ADHD فكان عندي فضول ادخل اعرف ايه ده فدخلت فعلا وبدأت احل اسألة الاختبار والمفاجاة اوالصدمة بالنسبالي اني لقيت نفسي عندي نسبة اشتباه كبيرة بالمرض ده .. طبعا قولت لا اكيد وفي حاجة غلط وقفلت الموقع وقولت اجرب موقع تاني وفعلا جربت موقع تاني خالص ووعملت الاختبار ولقيت برضو النتيجة في نسبة كبيرة إصابة بالمرض ده !!
من ساعتها بدات نظرتي تتغير شوية للمشاكل اللي كانت عندي وبدأت اقرأ اكتر عن ايه هو الاضطراب ده ويدات ادخل في جروبات على الفيس بتتكلم عنه وعن الناس المصابة وبدات اشوف الناس دي بتشتكي من ايه او ايه الاعراض اللي عندهم وفعلا لقيت كذا حاجة من الحاجات دي عندي هو اه مش كلها بالظبط بس في تشابه في كذا حاجة ..من ساعتها وانا وبقيت متردد شوية ومطمن شوية .متردد لاني مش عارف هل انا فعلا طلعت ADHD وللا لا ..ومطمن او مرتاح شوية لانه لو فعلا طلعت ADHD فاخيرا عرفت انا بعاني من ايه من صغري واخيرا لقيت تفسير للحاجات اللي بتحصلي .. بالمناسبة انا علاقتي كويسة الي حد ما بربنا.. يعني محافظ على الصلاة وخاتم قرٱن والحمدلله بحاول على قد ماقدر مزعلش حد مني..انا اسف جدا جدا جدا على الاطالة بس الواحد مخزن جواه كتيير ولما صدق يتكلم ?..حضرتك براحتك خاالص واي اسئلة حضرتك حابب تسالها اتفضل..اسف جدا مرة تانية على الاطالة ..ربنا يعينك ويكرمك ويجزيكم كل خير والله -
2 Replies
-
شكرا لسؤالك وصدقك في طرح قصتك. سعدت جدا أن هناك نماذج لشباب عنده بصيرة بتقدر تساعده يدرك اماكن ضعفه ونقاط قوته وبيحاول بشكل مستمر التعامل معها بدل دفن الرؤوس في الرمال.
الاضطرابات النفسية موجودة من زمن طويل لكن نمط الحياة الحالي وضغوطات الحياة والتوجه المادي القوي لكثير من المجتمعات أدي إلي زيادة واضحة في نسب انتشار الكثير من تلك الاضطرابات النفسية اللي منها طبعا الاكتئاب والتوتر ونوبات الهلع وغيرها.
الأعراض اللي حضرتك ذكرتها في البداية واضح انها كانت متوافقة مع تشخيص panic attack او نوبات الهلع وهو اضطراب بينشأ لأسباب كتير وفي بعض الأحيان لا يكون هناك trigger او سبب واضح لحدوث النوبات. بعض المرضي تحدث له النوبات بدون أي سبب واضح أو مقدمات.
طبعا التخويف المستمر من الموت واستخدام تأثيرات صوتية او مرئية ممكن يؤثر علي أي انسان، وينصح دايما بعدم تعريض الأطفال لاي نوع من تلك المؤثرات لانها فعلا تترك أثار سلبية في حياتهم. الأفضل دائما استخدام الترغيب مع الأطفال وتذكيرهم بالنعيم الذي يحصل عليه الصالحون بدلا من تخويفهم من الموت والنار وعذاب القبر وما شابه.
مرض تشتت الانتباه وفرط الحركة هو مرض متعارف عليه من تسعينات القرن الماضي لكن للاسف مازال هناك نسبة كبيرة من الأطباء أنفسهم لا يؤمنون بوجوده بالرغم من ظهور دراسات عديدة تؤكد وجود تغييرات واضحة في أدمغة الأطفال والبالغين الذين يعانون من هذا المرض. هناك أعراض كثيرة وهناك طرق علاج مختلفة لهذا المرض لكن من المهم تقييم واضح من الطبيب النفسي لكل حالة علي حدي. بعض الأعراض التي ذكرتها يمكن أن يكون سببها اضطراب تشتت الانتباه وفرط الحركة، لكن في الواقع يمكن أيضا أن تكون بسبب الاكتئاب او اضطراب القلق. التقييم الدقيق لتلك الأعراض من خلال الطبيب النفسي هو الطريقة الوحيدة التي يمكن من خلالها التفريق بين الأسباب المختلفة لتلك الأعراض.
من المهم أيضا عدم الاعتماد الكامل علي الادوات او الاختبارات الموجودة علي الانترنت لانها بتكون غير دقيقة. التقييم الاكلينيكي من الطبيب النفسي المتخصص هو الطريقة الوحيدة لاعتماد تشخيص مرض تشتت الانتباه وفرط الحركة. هناك قصص نجاح كثيرة لأشخاص تغيرت حياتهم بعد التشخيص وبدأ العلاج.
أخيرا أشكر لك مشاركتك الصادقة لمشاعرك وتجاربك التي مررت بها، وأتمني لك دوام الصحة وكامل العافية
-
مساء النور اهلا وسهلا بحضرتك طبعا كلامك السلبي عن نفسك وحالتك كثيير جداااااا غير كده انك بتجرب وتشخصيك حالتك من نفسك ده اجتهاد بس مش صح الافضل انك تتجه لمختص افضل ولا تنصت لاى اى حاجة عشوائية ع النت ثانيا انك تخاف من الموت تعالى واحدة واحدة اذا انت عامل اللى عليك مع علاقتك مع ربنا مش هتخاف من اللقاء ربنا يبقى علينا نصلح العلاقة مع ربنا كل امور هتكون ع افضل حال بامر الله ثالثا عدم التركيز اولا كلام السلبي بياثر ثانيا انت مهندس يعني شخص عملى 1 +1=2 حاول تسخدم الموضوعات العملية تدمج معه شوية ويعض الامور زاى مثلا الكتابة انك تكتب مشكلتك وتخرج كل مشاعرك الداخلية ..انك ترسم تلون تسمع موسيقى تمارس رياضية حتي اذا كانت ابسط الامور المشي ده هيساعدك ع التركيز وتقوية الذاكرة مع العلم اننا كل ما نكبر بيقل تركيزنا اذا لم نشتغل صح عليها —
رسالتي متاخرة بس اتمني تقراها انا فى انتظار ردك تواصلك معايا
Log in to reply.